काठमाडौं– समाजमा शान्तिसुरक्षा कायम गर्न भन्दै नेपाल प्रहरीले समुदायसँग सहकार्य गर्ने लक्ष्यसहित थालेको ‘समुदाय–प्रहरी साझेदारी’ कार्यक्रम कार्यान्वयनका लागि ७४७ स्थानीय तहसँग सम्झौता गरेको छ ।

‘हर प्रहर, गाउँ र नगरी, टोल टोलमा नेपाल प्रहरी’ नाराका साथ कात्तिक ११ गतेदेखि कार्यक्रम शुरु भएको थियो । कार्यक्रमअन्तर्गत ७५ जिल्ला समिति, ७३७ गाउँपालिका समिति, ३ हजार ९ सय ४१ वडा समिति, दुई हजार ९ सय ४६ टोल समिति र चार हजार ३ सय ५२ विद्यालय सम्पर्क समिति गठन गरिएको प्रहरीले जनाएको छ ।

सामाजिक न्याय, राष्ट्रिय सुरक्षा, आपसी मेलमिलाप, सामुदायिक शिक्षा र जनचेतना जगाउने उद्देश्यले थालिएको कार्यक्रम सञ्चालनका लागि कूल १० हजार ५६ प्रहरी कर्मचारीलाई प्रशिक्षण दिइएको प्रहरी प्रवक्ता उत्तमराज कार्कीले बताए ।