एजेन्सी– पूर्वी सिरियामा आतंकवादी संगठन इस्लामिक स्टेटको नियन्त्रणमा रहेको क्षेत्रबाट हजारौँ मानिसहरु बाहिरिएका छन् ।

अमेरिका समर्थित कुर्दिस लडाकुको नेतृत्वमा रहेको फौजले डिएर एजजोर प्रान्तको बघुज शहरमा इस्लामिक स्टेटको नियन्त्रणमा रहेको क्षेत्रमा सैनिक कारवाही गरिरहेका बेला त्यहाँबाट मंगलबार र बुधबार गरी सयौँ इस्लामिक स्टेटका लडाकु सहित ६ हजार ५ सयभन्दा धेरै मानिसहरु बाहिरिएका हुन् ।

इस्लामिक स्टेटविरुद्ध लडिरहेका एसडीएफ फौजका कमाण्डरका अनुसार मानिसहरु सुरक्षित साथ बाहिरिउन् भन्नाका लागि सैनिक कारवाहीलाई सुस्त पारिएको छ ।

यद्यपि इस्लामिक स्टेट नियन्त्रित भूभागमा अझै कति लडाकु छन् भन्ने स्पष्ट नभइसकेको बताइएको छ । बघुज शहर आसपास रहेको इस्लामिक स्टेटको नियन्त्रित क्षेत्र पूर्वी सिरियामा इस्लामिक स्टेटको अन्तिम गढ हो ।