काठमाडौं– नेपाल शारीरिक सुगठन तथा फिटनेस् संघ (एनबीबीएफए) ले बाह्रौं दक्षिण एसियाली शारीरिक सुगठन प्रतियोगिता आयोजना गर्ने भएको छ ।

राजधानीमा आज (बुधबार) संघले पत्रकार सम्मेलन गरी प्रतियागिता जुन २० देखि २३ सम्म आयोजना हुने जानकारी दिएको हो । दक्षिण एसियाका ८ राष्ट्रले प्रतियोगितामा सहभागिता जनाउने छन् ।

प्रतियोगितामा नेपालसहित अफगानिस्तान, बंगलादेश, भुटान, भारत, माल्दिभ्स, पाकिस्तान र श्रीलंकाले सहभागिता जनाउने छन् । आयोजक एनबीबीएफएले विभिन्न तौल समूहका गरी १३ विधामा प्रतिस्पर्धा गर्ने जानकारी दिएको हो ।

नेपाल प्रतियोगिताका लागि न्युट्रल भेन्यू रहेकाले सम्पूर्ण दक्षिण एयिाली राष्ट्रहरुले सहभागिता जनाउने एनबीबीएफएका अध्यक्ष राजुबाबु श्रेष्ठले बताए । “नेपाल सार्क मुलुकहरुको न्युट्रल भूमि भएकाले सबैसँग छलफल गरेर प्रतियोगितामा सहभागिता हुने जानकारी गराएका हौं,” श्रेष्ठले भने ।

मिति घोषणा कार्यक्रममा वल्र्ड वडीविल्डिङ एन्ड फिजिक्यु स्पोट फेडेरेसनका सदस्य सचिव तथा एसियन वडीडिविल्डिङ एन्ड फिटनेस फेडेरेसनका अध्यक्ष दातुक पाउल चाउको समेत सहभागिता रहेको थियो ।

चाउले नेपालले गरिरहेको प्रतियोगिताको तयारीमा आफू सन्तुष्ट रहेको बताए । उनले आफू पहिलो पटक आएको र नेपाल निकै सुन्दर भन्दै प्रशंसा पनि गरेका थिए । प्रतियोगिताको अनुमानित लागत ४० लाख रहेको आयोजकले जानकारी गराएको छ ।

प्रतियोगितामा झण्डै १ सय ५० खेलाडीको सहभागिता रहने बताइएको छ भने नेपालबाट बैशाख २० र २१ गते काठमाडौंमा आयोजना हुने सातौं मिस्टर हिमालयका विजेता छनोट हुनेछन् ।