नस्साउ– अमेरिकी मुलुक बहमासमा आएको डोरियन नामको आँधीका कारण मृत्यु हुनेको सङ्ख्या २० पुगेको छ ।

अमेरिकातर्फ तीव्र गतिमा अघि बढिरहेको आँधीबाट बहामासमा ज्यान गुमाउनेको सङ्ख्या २० पुगेको बहामासका स्वास्थ्यमन्त्री डुआन स्याण्ड्सले जनाएका हुन् । आँधी हाल १६५ किलोमिटर प्रतिघण्टाको गतिमा अमेरिकाको पूर्वी तटतर्फ अघि बढिरहेको छ ।

आँधीले गत सेप्टेम्बर १ मा उत्तरी बहामासको अबाकोस तथा ग्राण्ड बहामा टापुमा दुई दिनसम्म भीषण वर्षा गराएको थियो । आँधी हाल कमजोर बन्दै गएको र बिहीबारसम्म आँधीले अमेरिकाको साउथ क्यारोलाइना वा नर्थ क्यारोलाइना राज्यमा भारी वर्षा गराउने अनुमान गरिएको छ ।

डोरियन आँधीबाट बहामासको जनजीवन अस्तव्यस्त भएको छ भने पूर्वी अमेरिकाका सयौं उडान रद्द गरिएका छन् । बहामासका प्रधानमन्त्री हुबर्ट मिन्निसले आँधीलाई इतिहासकै सबैभन्दा ठूलो विपद्को संज्ञा दिएका छन् ।