वीरगन्ज– मंगलबार राति हतियारसहित पक्राउ परेका सन्तोष दास उर्फ सत्य राज योगीको घरमा पेस्तोलको म्यागेजिन फेला परेको छ ।

प्रहरीलाई हतियार देखाएर भाग्दै गरेको अवस्थामा योगी मंगलबार राति वीरगन्जबाट पक्राउ परेका थिए ।

प्रहरीले योगीलाई नियन्त्रणमा लिन गोली चलाउनु परेको थियो । उनको साथबाट एउटा पेस्तोल र त्यसमा लाग्ने १७ राउण्ड गोली बरामद भएको थियो ।

प्रहरीले थप अनुसन्धानअन्तर्गत वीरगन्जको इनर्वास्थित योगीको घरमा समेत खानलासी गरेको थियो । घरमा तलासी गर्दा पेस्तोलको म्योगेजिन १ जान र १ थान पेटनड्राइभ बरामद भएको जिल्ला प्रहरी कार्यालय पर्साले जनाएको छ ।

प्रहरीका अनुसार योगी फुल हसन अन्सारी समूहका सदस्य हुन् । कर्तव्य ज्यान मुद्दामा कैद सजाय काटेर छुटेका अन्सारी पछिल्लो समय पुनः अपराधिक गतिविधिमा संलग्न हुँदै आएका छन् ।

प्रहरीका अनुसार फुल हसन अन्सारी समूहले पछिल्लो समय विभिन्न व्यवसायीबाट अवैध रुपमा रकम असुल्नेदेखि सर्वसाधारण र कर्मचारीलाई समेत फोन गरेर धम्की दिँदै आएको छ ।

अन्सारी समूहका सदस्यको खोजीकै क्रममा मंगलबार योगी पक्राउ परेका हुन् ।