एजेन्सी– अमेरिकी राष्ट्रपति डोनाल्ड ट्रम्पले अमेरिकामा हुने गरेका गोलीकाण्डका लागि भिडियो गेमहरु आशिंक रुपमा जिम्मेवार रहेको बताएका छन् ।

अमेरिकाको टेक्सस राज्यस्थित एल पासो शहर तथा ओहाया राज्यको डेयटन शहरमा भएका दुई गोलीकाण्डमा परी ३० जनाको ज्यान गएको घटनापछि ट्रम्पले यस्तो प्रतिक्रिया दिएका हुन् ।

सम्बोधनका क्रममा राष्ट्रपति ट्रम्पले त्यस्ता भिडियो गेमहरुले हिंसालाई प्रोत्साहन गर्ने भन्दै भिडियो गेमका कारण पनि अमेरिकामा गोलीकाण्डहरु हुने गरेको जिकिर गरे ।

यद्यपि, वैज्ञानिक शोधहरुले भने भिडियो गेम र गोलीकाण्डबीच अर्थपूर्ण सम्बन्ध हुने प्रमाणित गर्न सकेका छैनन् । हिंसात्मक भिडियो गेम र व्यवहारिक हिंसाबीच हुने सम्बन्धबारे विज्ञहरुबीच मतभेद रहने गरेको छ ।