काठमाडौं – मलेसियामा जारी एसीसी यु–१९ इस्टर्न रिजन क्रिकेट प्रतियोगितामा नेपालले दोस्रो जीत हात पारेको छ ।

मलेसियाको किन्नरा ओभलमा भएको खेलमा नेपालले सिंगापुरलाई २सय१७ रनले पराजित गरेको हो ।

टस जितेर पहिलो ब्याटिङ गरेको नेपालले दिएको ३सय२७ रनको विशाल लक्ष्य पछ्याएको सिंगापुर ३९.१ ओभरमा सबै विकेट गुमाएर मात्रै १सय९ रन मात्रै बनाउन सक्यो ।

सिंगापुरलाई १०९ रनमा रोक्न नेपालका कुसल मल्लले उत्कृष्ट बलिङ गरे ।

उनले सिंगापुरका ४ विकेट लिँदा सिंगापुर कमजोर भएको थियो । सिंगापुरका लागि १०९ रन बनाउने क्रममा हरी कुकरेजले ३० रन बनाउँदा कनुसामी सतिसले २४ रन र चन्दमुली श्रीदेवले २३ रन बनाए ।

सिंगापुरविरुद्ध मल्लले ४ विकेट लिँदा तिलक राज भण्डारीले २ विकेट लिए भने राशिद खान र सागर ढकालले समान एक–एक विकेट लिए ।

यसअघि पहिलो ब्यटिङ गरेको नेपालले निर्धारीत ५० ओभरको खेल पूरा खेल्दै ४ विकेट गुमाएर ३ सय २६ रन बनाएको थियो । नेपालका लागि रित गौतम र खड्क बहादुर बोहराको साझेदारी उत्कृष्ट रह्यो ।

रित गौतम र खडकले १३१ रनको साझेदारी खेलेका थिए ।

ओपनिङ ब्याट्सम्यान रित गौतमले शतक प्रहार गरे । उनले १३७ बलमा १० चौका र १ छक्काको मतद्दामा १ सय १५ रनको उत्कृष्ट पारी खेलेका थिए ।

त्यस्तै, तेस्रो विकेटका रुपमा मैदान प्रवेश गरेका खडकले ९० बलमा १२ चौकाको मद्दतमा ९० रन बनाएका थिए ।

यस्तै, कुसल मल्लले विस्फोटक ब्याटिङ गर्दै २३ बलमा ५१ रन बनाए ।

उनले ५ छक्का र ४ चौका प्रहार गरेका थिए भने पवन सरार्फले ४५ रन बनाएका थिए । नेपालविरुद्ध सिंगापुरका भिनित चित्तेस महेता र पर्नव सुदर्शन राजेश कृष्णले समान दुई–दुई विकेट लिएका थिए ।