अष्ट्रेलिया– अष्ट्रेलिया प्रहरीले एबीसी टेलिभिजनको सिड्नीस्थित कार्यालयमा छापा मारेको घटनालाई लिएर आलोचना शुरु भएको छ ।

अष्ट्रेलियाको पत्रकार युनियनले प्रहरीको उक्त कार्य निन्दनीय भएको भन्दै प्रेस स्वतन्त्रताविरुद्धको कार्यको घोर भर्त्सना गरेको छ । त्यसबाहेक अष्ट्रेलियाका अन्य मानवअधिकारवादी संगठन र युनियनहरुले समेत उक्त गतिविधिको आलोचना गरेका छन् ।

अफगानिस्तानमा अष्ट्रेलियन फौजले गरेको भनिएको गैरकानूनी हत्या तथा अन्य अवैध गतिविधीबारे सन् २०१७ मा प्रकाशित अनुसन्धानमूलक समाचारका विषयमा प्रहरीले छापा मारेको एबीसीले जनाएको छ । त्यसबेला एबीसीले अष्ट्रेलियन फौजले अफगानिस्तानमा गरेको भनिएको गैरकानूनी गतिविधिबारे गोप्य समाचार सार्वजनिक गरेको थियो ।

यता अष्ट्रेलियन प्रहरीले भने एबीसीले गोप्य रक्षा दस्तावेज सार्वजनिक गरेको र यसले अष्ट्रेलियाको राष्ट्रिय सुरक्षामा नकारात्मक असर पार्नसक्ने भन्दै छापा मारिएको दाबी गरेको छ ।