रोल्पा– बिद्यालय ढिलो आएको भन्दै पाँच जना बिद्यार्थीको हात भाँचिने गरि कुट्ने शिक्षिकालाई प्रहरीले पक्राउ गरेको छ । रोल्पाको रुम्टीगढी गाउँपालिका–८ स्थित भानु आधारभूत विद्यालयकी शिक्षिका लक्ष्मी पुनलाई इलाका प्रहरी कार्यालय होलेरीबाट गएको प्रहरी टोलीले पक्राउ गरेको हो ।

शिक्षिका पुनलाई पीडित पक्षले दिएको जाहेरीका आधारमा कारबाही प्रक्रिया अघि बढाइने प्रहरीले बताएको छ । उपचार खर्च १८ हजार दिने सहमतिमा घटना मिलाए पनि पैसा नदिएपछि घटना सार्वजनिक भएको हो ।

जेठ १२ गते निमित्त प्रधानाध्यापकको जिम्मेवारी सम्हालेकी पुनले निजी स्रोतमा कक्षा १ देखि पाँच सम्म पढाउदै आएकी छिन् । उनले यसअघि पनि विद्यार्थीहरुलाई यसरी नै पिट्ने गरेको घाईते विद्यार्थीहरुले बताएका छन् ।

फेरि पनि कुटाई खाइने पो हो कि भन्ने डरले शिक्षिकाको यातनाका बारेमा विद्यार्थीहरुले केही बोल्न चाहेका छैनन् । शिक्षिकाको कुटाईबाट यसअघि पनि एक जना बिद्यार्थीको कान फुटेको र अहिले कानै नसुन्ने भएको समेत विद्यार्थीको आरोप छ ।

शिक्षिकाको कुटाईबाट हात भाचिएकाहरु भीमकुमारी बाँठा, निर्मला पुन, गौरी घर्ती, शान्ता नेपाली र विमला रोका रहेका छन् ।