उर्लाबारी– कांग्रेस नेता तथा पूर्वगृहमन्त्री कृष्णप्रसाद सिटौलाले नेपाली कांग्रेस इन्जिन विनाको गाडी जस्तै बनेको भन्दै यसतर्फ सचेत रहन युवाहरुमाझ जागरण गरेका छन् ।

कांग्रेसको राष्ट्रिय जागरण अभियानअन्तर्गत मोरङ क्षेत्र नं. १ को आयोजनामा उर्लाबारीमा आयोजित कार्यक्रममा नेता सिटौलाले कांग्रेसलाई चलायमान बनाउन देशभरी जागरण अभियान चलाइरहेको उल्लेख गर्दै अब कांग्रेस इन्जिन विनाको गाडी बन्न नहुने उनले बताए ।

मुलुकमा भएका हरेक आन्दोलनमा कांग्रेसको भूमिका महत्वपूर्ण रहेको बताउँदै उनले कांग्रेसलाई चलयमान र सक्रिय बनाउन कार्यकर्ताले नेतृत्वलाई खबरदारी गर्नु पर्नेमा जोड दिए ।

उनले पार्टी नेतृत्वले भातृ संगठनहरुलाई राम्रोसँग परिचालन गर्न नसकेको बताए । तरुण दल, नेविसंघ र महिला संघ कुनैपनि भातृ संगठनहरुले राम्रोसँग काम नगरिरहेको नेता सिटौलाको भनाई छ ।

उनले पार्टीभित्र आपसी बैमनस्यता र कलह अन्त्य गर्न लाग्नु पर्ने आवश्यकता रहेको औल्याए । वर्तमान सरकार जनताको नभई कम्युनिष्टको मात्र भएको समेत उनले आरोप लगाए ।

कार्यक्रममा बोल्दै अधिकांश नेता तथा कार्यकर्ताहरुले पार्टीमा मौलाएको गुटगत राजनीतिको अन्त्य नभएसम्म कांग्रेस चलयमान बन्न नसक्ने बताए ।