काठमाडौं– बेलायती प्रधानमन्त्री टेरिजा मेले युरोपेली युनियन इयुबाट बाहिरिने म्याद आगामी जुन ३० सम्म बढाउनका लागि इयुलाई औपचारिक पत्र लेखेकी छिन् ।

बेलायती सञ्चारमाध्यमका अनुसार उनले युरोपेली परिषद्का अध्यक्ष डोनाल्ड टुस्कलाई सम्बोधन गर्दै लेखेको पत्रमा हाल बेलायतमा बेलायत इयुबाट बाहिरिने प्रक्रिया ब्रेक्जिटबारे गरिएको सम्झौताको प्रस्ताव संसद्ले पारित गर्न नसकेको र यसबारे प्रयास भइरहेको भन्दै त्यसका लागि आगामी जुन ३० सम्मको म्याद थप्न आग्रह गरिएको छ ।

ब्रेक्जिटबारे उनले इयुसँग गरेको सम्झौता बेलायती संसद्ले तीन पटकसम्म अस्वीकार गरिसकेको छ । यसअघि मार्च २९ मा औपचारिक रुपमा बेलायत इयुबाट बाहिरिने मिति तोकिएपनि मेले इयुसँग ब्रेक्जिटको मिति सार्न अनुरोध गरेकी थिइन् । उनको अनुरोधअनुसार बेलायत इयुबाट औपचारिक रुपमा बाहिरिने मिति मार्च २९ बाट बढाएर अप्रिल १२ सम्म सारिएको थियो ।

तर, अप्रिल १२ मा पनि प्रधानमन्त्री मेको बे्रक्जिट सम्झौता बेलायती संसद्ले पारित गर्ने सम्भावना कम रहेकाले त्यसलाई पनि बढाउन मेले इयुसमक्ष आग्रह गरेकी हुन् ।

उनको पत्रमा आगामी मे २३ मा हुने युरोपेली संसद्को निर्वाचनको समयमा पनि बेलायत इयुको सदस्य नै रहने अवस्था आएको खण्डमा उक्त चुनावमा बेलायतबाट पनि उम्मेद्वार उठाउन सक्ने उल्लेख छ ।

मेले पठाएको पत्र बारे युरोपेली परिषद्ले इयु सदस्य राष्ट्रका प्रतिनिधिसँग बे्रक्जिटको म्याद बढाउन प्रस्ताव गर्ने तथा सदस्य राष्ट्रका प्रतिनिधिले सर्वसम्मत रुपमा त्यो प्रस्ताव पारित गर्नुपर्ने व्यवस्था छ ।