काठमाडौं– अफगानिस्तानको बदघीस प्रान्तमा इस्लामिक लडाकु समूह तालिबान र अफगान फौजबीच भिडन्त भएको छ । भिडन्तमा ६६ जनाको ज्यान गएको छ ।

सयौँको सङ्ख्यामा आएका तालिबान लडाकुले बदघीस प्रान्तको बाला मुरघब जिल्लामा सरकारी सुरक्षाकर्मीलाई लक्षित आक्रमण गरेपछि भिडन्त भएको हो । भिडन्तमा मारिनेमा ३६ सरकारी सुरक्षाकर्मी रहेको तालिवानको दाबी छ ।

अफगान सेनाले भने आक्रमणमा ३० तालिबान लडाकु पनि मारिएको जनाएको छ । भिडन्तमा अरु दर्जनौँ घाइते भएका छन् । आक्रमणका क्रममा तालिवानले त्यस जिल्लाका केही सुरक्षा जाँच चौकी पनि कब्जामा लिएको जनाएको छ ।

यता अफगान रक्षामन्त्रालयले भने सर्वसाधारणको हताहती नहोस् भन्नाका लागि त्यस क्षेत्रबाट सामरिक रुपमा पछि हटेको जनाएको छ । पछिल्ला दुई महिनायता बदघीस प्रान्त र बाला मुरघब जिल्लामा तालिवान र सुरक्षा फौजबीच भिडन्त हुदै आएका छन्।

तालिवान र अमेरिकाबीच शान्ति वार्ताको क्रम जारी रहेका बेला तालिवानले वार्ताका क्रममा आफ्नो पक्ष बलियो बनाउनका लागि सरकारी सुरक्षाकर्मीविरुद्ध आक्रमण भएको हुनसक्ने अनुमान छ।