एजेन्सी–इङिग्लस प्रिमियर लिग फुटबल क्लबहरुले खेलाडीलाई टिममा भित्र्याउँदा ‘एजेण्ट’ले पाउने रकममा वृद्धि भएको छ । ट्रान्सफर मार्केटले बिहीबार सार्वजनिक गरेको तथ्याङ्कमा प्रिमियर लिगमा खेलाडीको व्यवस्थापन गरेवापत एजेण्टले पाउने रकम पछिल्लो १२ महिनामा अत्यधिक वृद्धि भएको हो ।

सार्वजनिक भएको तथ्याङ्क अनुसार प्रिमियर लिग क्लबहरुले एजेण्टका लागि सन् २०१८—१९ को सिजनमा २६० मिलियन पाउण्ड खर्च गरेको भेटिएको छ । जुन यसअघिका वर्षहरुमा भन्दा ४९ मिलियन पाउण्ड धेरै हो ।

सन् २०१८ फ्रेब्रुअरीदेखि ३१ जनवरी २०१९ सम्म प्रिमियर लिग क्लब लिभरपुलले एजेन्टका लागि धेरै खर्च गरेको छ । जसमा लिभरपुलले ४३ मिलियन पाउण्ड एजेण्टका लागि खर्च गरेको हो ।

यस्तै चेल्सीले २६ मिलियन पाउण्ड खर्च गर्दा म्यानचेस्टर सिटीले २४ मिलियन पाउण्ड खर्च गरेको छ । त्यस्तै म्यानचेस्टर युनाइटेडले २० मिलियन पाउण्ड खर्चदा आर्सनल र टोटेनह्यामले समान ११—११ मिलियन पाउण्ड खर्च गरेको देखिएको छ ।

यस्तै, च्याम्पियनसिप क्लबहरुले समग्रमा ५० मिलियनको हाराहारीमा एजेन्टका लागि खर्च गरेका छन् भने जुन खर्च यसअघिका वर्षभन्दा ८ मिलियन बढी हो ।