काठमाडौं– अछामको साँफेबगर नगरपालिका–३ सिद्धेश्वरकी २१ वर्षीया पार्वती बुढा रावतको छाउगोठमा मृत्यु भएको प्रकरणमा प्रहरीले उनका जेठाजु छत्र रावलाई पक्राउ गरेको छ ।

सोधपुछका लाजि जिल्ला प्रहरी कार्यालय मंगलसेन बोलाएर प्रहरीले रावतलाई हिरासतमा राखेको हो ।

छाउपडी प्रथा कानून अपराध भएकाले रावतलाई आवश्यक अनुसन्धानका लागि हिरासतमा लिइएको जिल्ला प्रहरी कार्यालय अछामका प्रहरी नायव उपरीक्षक (डीएसपी) जनकबहादुर शाहीले जानकारी दिए ।

पक्राउ परेका रावतविरुद्ध प्रहरीले मुलुकी फौजदारी अपराध संहिताको दफा १६८ को उपदफा (३) बमोजिमको कसुरअन्तर्गत कारबाही प्रक्रिया अगाडि बढाएको छ ।

फौजदारी संहिताको दफा १६८ को उपदफा (३) मा रजश्वला वा सुत्केरीको अवस्थामा छाउपडीमा राख्न वा त्यस्तै अन्य कुनै किसिमको भेदभाव, छुवाछुत वा अमानवीय व्यवहार गर्न नपाइने व्यवस्था गरिएको छ । यस्तो कसुर गर्ने व्यक्तिलाई ३ महिनासम्म कैदा वा तीन हजार रुपैयाँसम्म जरिवाना वा दुवै सजाय हुने व्यवस्था गरिएको छ ।

प्रहरीले रावतविरुद्ध ज्यानसम्बन्धी कसुरअन्तर्गत पनि अनुसन्धान अगाडि बढाएको छ ।

मुलुकी फौजदारी अपराध संहिताको ज्यानसम्बन्धी कसुरअन्तर्गत दफा (१७८) को उपदफा (१) मा ज्यान जान सक्ने काम गर्न नहुने उल्लेख छ । यस्तो कसुर गर्ने व्यक्तिलाई जन्म कैदसम्मको सजाय हुने व्यवस्था अपराध संहितामा गरिएको छ ।

‘अहिले रावतमाथि अनुसन्धान शुरु भएको छ । उनले महिला (मृतक पार्वती)लाई छाउ गोठमा बस्न बाध्य पारेका हुन् भने ज्यान जान सक्ने काम गरेको अभियोगमा पनि अनुसन्धान हुन्छ,’ जिल्ला प्रहरी कार्यालय अछामका एक अधिकारीले भने ।

श्रीमानसहित ससुरा र सासुसमेत कामका लागि भारतमा रहेको अवस्थामा पार्वती आफ्ना जेठाजु र जेठानीसँग बस्दै आएकी थिइन् ।

महिनावारी भएको बेला छाउगोठमा बसेको अवस्थामा पार्वतीको आइतबार राति मृत्यु भएको थियो ।