एजेन्सी– अमेरिकी राष्ट्रपति डोनाल्ड ट्रम्पले भारतलाई यसअघि अमेरिकाले दिँदै आएको विशेषाधिकारसहितको व्यापारिक छुट कटौती गर्ने भएका छन् ।

राष्ट्रपति ट्रम्पले सोमबार यसअघि ५ अर्ब ६० करोड भन्दा धेरैको भारतीय सामानको आयातमा अमेरिकामा भन्सार छुट दिइँदै आएकोमा अब त्यो बन्द गरिने जनाएका हुन् ।

अमेरिकी व्यापार घाटा कम गर्न प्रयासरत राष्ट्रपति ट्रम्पले यसअघि पनि भारतलाई आफ्नो अमेरिकी सामानमा भन्सार घटाउन आग्रह गर्दै आएका थिए ।

राष्ट्रपति ट्रम्पले कङ्ग्रेसका नेताहरुलाई पठाएको पत्रमा भारत सरकारसँग सघन वार्ताका बावजुद भारतले आफ्नो बजारमा अमेरिकी सामानलाई उचित पहुँच दिनमा विश्वस्त पार्न नसकेका कारणले आफूले यस्तो कदम चाल्नुपरेको उल्लेख गरेका छन् ।

भारतलाई दिइदै आएको विशेषाधिकार कटौति गर्ने ट्रम्पको कदम औपचारिक रुपमा कार्यान्वयन हुन भने ६० दिन लाग्नसक्ने बताइएको छ ।

अमेरिकाको ‘जेनेरलाइज्ड सिस्टम अफ प्रिफरेन्स जिएसपी’ नामक कार्यक्रमअन्तर्गत विभिन्न मुलुकका सामानले अमेरिकी बजारमा बिना भन्सार पहुँच पाउँदै आएका छन् । भारत जीएसपी कार्यक्रमअन्तर्गत अमेरिकी बजारमा बिना भन्सार पहुँच पाउने सबैभन्दा ठूलो मुलुक हो ।

यता भारतले भने अमेरिकी कदमले अमेरिकासँगको आफ्नो व्यापारमा सीमित मात्र प्रभाव पार्ने भन्दै अमरिकी कदमको बदलामा भारतले कुनै कदम नचाल्ने जनाएको छ ।