काठमाडौं-एनसीसीएस-सिप्यान क्रिकेट अवार्ड २०१९ आज (मंगलबार) प्रदान गरिने भएको छ । क्रिकेट खेलाडी संघ नेपाल (सिप्यान)ले विभिन्न ५ विधामा अवार्ड प्रदान गर्नेछ ।

‘वर्ष उत्कृष्ट खेलाडी’ (पुरुष) ‘वर्ष उत्कृष्ट खेलाडी’ (महिला) ‘वर्ष उदीयमान खेलाडी’, ‘मोस्ट भ्यालुएबल मुभ्मेन्ट अफ दी इयर’ र ‘लाइफ टाइम अचिभ्मेन्ट अवार्ड’ गरी ५ विधामा अर्वाड प्रदान गरिनेछ ।

वर्षका उत्कृष्ट १० क्षण सिप्यानले यसअघि नै सार्वजनिक गरेको थियो । जुन भोटिङमार्फत् विजेता छानिनेछ । भोटिङ समय सोमबार राति सम्म थियो ।

वर्ष खेलाडी पुरुष र महिला तथा बर्षको उदीयमान खेलाडीको मनोनयन सिप्यानले गठन गरेको प्र्राविधिक टोलीले आइतबार सार्वजनिक गरिसकेको छ ।

यस्तै, लाइफ टाइम अचिभ्मेन्ट अवार्ड प्राविधिक टोलीले अर्वाड प्रदान कार्यक्रममा सार्वजनिक गर्ने जानकारी दिएको छ ।

वर्ष उत्कृष्ट खेलाडीमा राष्ट्रिय क्रिकेट टोलीका कप्तान पारस खड्का दीपेन्द्रसिंह ऐरी, करण केसी, सन्दीप लामिछाने र सोमपाल कामी मनोनयनमा परेका छन् ।
यस्तै, उत्कृष्ट खेलाडी महिलातर्फ राष्ट्रिय महिला टोलीकी कप्तान रुवीना क्षेत्री बेलबासी, इन्दु बर्मा, करुणा भण्डारी, सरिता मगर र सीता खराना मगर मनोनयनमा परेका छन् ।

वर्षको उदयीमान खेलाडीमा अभिनास बोहरा, ललित नारायण राजवंशी, रोहित कुमार पौडेल, सन्दीप जोरा र कविता कुँवर छन् ।

क्रिकेट खेलाडी संघले पहिलो पटक आयोजना गरेको अर्वाड कार्यक्रमले खेलाडीहरुका लागि उत्प्रेरणा बन्ने आशा गरिएको छ । वर्ष उत्कृष्ट खेलाडीमा युवा खेलाडीदेखि राष्ट्रिय टोलीका कप्तान पारस खड्कासम्मको नाम छ ।

पुरुषतर्फ उत्कृष्ट वर्ष खेलाडीले नगद १ लाख ३२ हजार पुरस्कार राशी प्राप्त गर्नेछन् भने अन्य ४ वटै विधाका पुरस्कृत हुने खेलाडीले समान ६६ हजार प्राप्त गर्नेछन् ।