काठमाडौं–झापा विद्रोहका शहीदको स्मृतिमा आज (मंगलबार) सुखानीमा श्रद्धाञ्जलीसभा हुने भएको छ । श्रद्धाञ्जलीसभालाई प्रधानमन्त्री तथा तत्कालीन झापा विद्रोहका नेता केपी शर्मा ओली र नेपाल कम्युनस्टि पार्टी नेकपाका अर्का अध्यक्ष पुष्पकमल दाहाल प्रचण्डले सम्बोधन गर्ने कार्यक्रम छ ।

श्रद्धाञ्जलीसभामा सहभागी हुन नेकपा अध्यक्ष प्रचण्ड सोमबार नै झापा पुगिसकेका छन् भने, प्रधानमन्त्री ओली आज झापा जाने कार्यक्रम छ ।

झापा विद्रोहका बेला तत्कालीन पञ्चायती सरकारले पक्राउ गरेका ५ युवा वीरेन राजवंशी, नारायण श्रेष्ठ, कृष्ण कुँइकेल, नेत्र घिमिरे र रामनाथ दाहाललाई २०२९ सालको फागुन २१ अर्थात आजकै दिन गोली हानी हत्या गरिएको थियो ।

आफ्ना सहादतप्राप्त योद्धाको सम्झनामा नेपालमा रहेका कम्युनिस्ट पार्टीहरुले प्रत्येक वर्ष फागुन २१ मा विभिन्न कार्यक्रमको आयोजना गरी झापा विद्रोहका शहीदको सम्झना गर्ने गरेका छन् ।

यस पटक नेकपा एमाले र नेकपा माओवादी केन्द्र एकीकरण बनेको नेपाल कम्युनिस्ट पार्टी नेकपाका दुवै अध्यक्षले सम्बोधन गर्ने गरी झापा विद्रोहका शहीदको सम्झना गर्ने कार्यक्रम तय गरिएको नेकपा सचिवालयले जनाएको छ ।