एजेन्सी– खुट्टामा चोट लागेर १० हप्ताको आराममा रहेका ब्राजिलियन फुटबलर तथा पेरिस सेन्ट जर्मन (पीएसजी) का स्टार फरवार्ड नेयमारले सहकर्मी युवा स्टार किलियन एमबाप्पेको खुलेरै प्रशंसा गरेका छन् । नेयमारले एमबाप्पेको प्रशंसा गर्दै भने, ‘एमबाप्पे फुटबल इतिहासको महान खेलाडी बन्न सक्छन्।’

२०१७ मा एमबाप्पे मोनाको क्लबबाट पीएसजीमा आवद्ध भएका थिए । उनले अहिलेसम्म पीएसजीबाट ५० गोल गरिसकेका छन् । गत शनिबार पनि फ्रान्सको ‘लिग वान’ उनले कानविरुद्ध २ गोल गरे । यो सँगै उनको पीएसजीमा आबद्ध भएपछि ५० गोल पूरा गरेका हुन् ।

फ्रान्स तथा पीएसजीका स्टारको नाममा विश्वकप तथा लिग वानका २ ट्रफी एम्बाप्पेले जितेका छन् । उनले ‘कपल डे फ्रान्स’ र ‘कपल डे ला लीगा’ बाट पनि सम्मान पाएका छन् ।

“मेरो उनी (एमबाप्पे) सँग सधै राम्रो सम्बन्ध छ । चाहे त्यो मैदानमा होस् वा मैदान बाहिर,” नेयमारले गोल डटकमसँग कुराकानी गर्दै भने, “म उनलाई ‘गोल्डेन व्वाइ’ भन्छु । उनी त्यस्ता व्यक्ति हुन जो सँधै मेरो हृदयमा रहन्छन् ।’ नेयमारले एम्बाप्पे इतिहासकै महान फुटबलर बन्ने र त्यसका लागि आफूले सक्ने सहयोग गर्ने बताएका छन् ।

नेयमारले दुवै जनाले अभ्यासमा अथवा मैदानमा एटिच्युड देखाएपनि पछि एक अर्काबीच सल्लाह हुने गरेको बताउँदै भने,“हामी एक अर्का प्रति सम्मान प्रकट गछौं । उनी र मेरो पासबाटै हामीले गोल गर्ने गछौं । मेरो पासमा उनले र उनको पासमा मैले गोल गरेका खेल धेरै छन् ।’ उनले बार्सिलोनामा रहँदा लियोनल मेस्सीसँग यस्तो ‘कम्बिनेसन’ रहने गरेको पनि सुनाए ।

एमबाप्पेले अहिलेसम्म पीएसजीबाट खेलेका ७६ खेलमा ५० गोल गरेका छन्। उनले २८ गोलका लागि अवसर सिर्जना गरेका छन् ।