एजेन्सी– अमेरिकाको तल्लो सदन ‘हाउस अफ रिप्रेजेन्टेटिभ’को न्याय समितिले राष्ट्रपति डोनाल्ड ट्रम्पले अमेरिकी न्यायिक प्रक्रियामा बाधा पुर्‍याएको तथा आफ्नो शक्तिको दुरुपयोग गरेको विषयमा अनुसन्धान थालेको छ ।

हाउस ज्युडिसियरी कमिटिले ट्रम्पले न्यायिक प्रक्रियामा बाधा पुर्‍याएको, भ्रष्टाचार गरेको, आफ्नो शक्तिको दुरुपयोग गरिएकोलगतयतका विषयमा अनुसन्धान थालिएको कमिटिका अध्यक्ष जेरोड नाड्लरले जनाएका छन् ।

अनुसन्धानका क्रममा ६० भन्दा धेरै व्यक्ति तथा संस्थाका दस्तावेज मगाएर छानबिन गरिने जनाइएको छ । दस्तावेज मागिने संस्था तथा व्यक्तिको विवरण सोमबारभित्र सार्वजनिक भइसक्ने बताइएको छ ।

एबीसी टेलिभिजनको ‘दिस विक’ नामक कार्यक्रमलाई दिएको अन्तरवार्ताका क्रममा कमिटिका अध्यक्ष नाड्लरले राष्ट्रपति ट्रम्पले सन् २०१७ को मे महिनामा रुससँग राष्ट्रपति ट्रम्पको साँठगाँठ रहेको विषयमा अनुसन्धान गरिरहेका अमेरिकी संघीय अनुसन्धान निकाय (एफबीआई)का तत्कालीन प्रमुख जेम्स कोमीलाई बर्खास्त गरी अमेरिकी न्यायिक प्रक्रियामा बाधा पुर्‍याएको स्पष्ट भइसकेको जनाए । यद्यपि उनलाई महाअभियोग लगाउने वा नलगाउने भन्नेबारे हाउस कमिटीको अनुसन्धानले बताउने नाड्लरको भनाइ छ ।

‘कसैलाई महाअभियोग लगाउनुअघि महाअभियोग लगाइँदैछ भन्ने बारे अमेरिकी जनताले जनताले थाहा पाउनुपर्छ,’ नाड्लरले भने ।

राष्ट्रपति ट्रम्पले कोमीलाई बर्खास्त गरेपछि कोमीले गरिरहेको अनुसन्धान गर्ने जिम्मा अमेरिकी न्याय विभागका विशेष अभियोजनकर्ता रोबर्ट मुल्लरलाई दिइएको थियो । मुल्लरले यसै साताभित्र अमेरिकी महान्यायाधिवक्ताको कार्यालयलाई आफ्नो अनुसन्धान प्रतिवेदन बुझउँदैछन् ।

मुल्लरको अनुसन्धान ट्रम्पले गरेका विशेष अवैधानिक कामहरुमा लक्षित रहेको, तर हाउस कमिटिको अनुसन्धान बृहद स्तरको हुने नाड्लरले जनाएका छन् ।

केही दिनअघि राष्ट्रपति ट्रम्पका पूर्व अधिवक्ता माइकल कोहेनले कङ्ग्रेसमा दिएको बयानमा राष्ट्रपति ट्रम्पले प्रचलित अमेरिकी कानूनको विपरित गइ विभिन्न कामहरु गरेको जनाएका थिए ।