काठमाडौं– डाक्टर धर्मकान्त बास्कोटाले त्रिभुवन विश्वविद्यालयको उपकुलपतिको जिम्मेवारी सम्हालेका छन् । आइतबार बसेको मन्त्रिपरिषद् बैठकले नियुक्त गरेका डा बास्कोटाले सोमबार  त्रिविमा पदभार ग्रहण गरेका हुन् ।

डाक्टर बास्कोटा यसअघि नेपाल मेडिकल काउन्सिलको अध्यक्ष थिए । डा बास्कोटाको केही महिना अघि मात्रै काउन्सिलमा पदावधि सकिएको थियो । डा बास्कोटा चिकित्सा शास्त्र अध्ययन संस्थान आईओएमका प्रोफेसर एवं टिचिङ अस्पतालका नाक,कान, घाँटी रोग विशेषज्ञ पनि हुन् ।

डा बास्कोटाले पदबहाली गर्दै आफूले त्रिविमा रहेको विकृतिहरु हटाउन पारदर्शी मापदण्डहरु बनाउने बताए ।

‘देशै समस्याग्रस्त भएको अवस्थामा त्रिवि पनि समस्याहरुबाट पर छैन, यहाँ चार थरीका व्यक्तिहरु छन्, यहाँ प्राध्यपक, विद्यार्थी, कर्मचारी र म्यानजरिङ क्षेत्रका व्यक्तिहरु छन्,’ डा बास्कोटाले खबरहबसँग भने, ‘यहाँ सबैको इन्ट्रेस्ट हेरेर काम गर्न थाल्यो भने समस्या आउँछ, हाम्रो इन्ट्रेस्ट भनेको विश्व विद्यालयलाई साच्चैको विश्वको विद्यालय बनाउने हो, जहाँ विश्वका हरेक मानिसहरु पढ्न आकर्षित हुनेछन् ।’

डा बास्कोटाले सरकारको माग अनुसार शिक्षालाई रोजगारमूलक बनाउँदै लैजाने बताए । उनले त्रिविमा नीति नियम र मापदण्डको अभावले समस्याहरु देखिएको भन्दै आफूले उपकुलपतिमा रहेर काम गर्दा सबैलाई नियममा बाध्नेगरी नीति, नियम र निर्देशिकाहरु निर्माण गर्ने बताए ।