काठमाडौं – एकदिवसीय क्रिकेटमा पाहुना टोली मेरिलेबोन क्रिकेट क्लब (एमसीसी) ले नेपाली राष्ट्रिय क्रिकेट टोलीलाई जितका लागि २०२ रनको लक्ष्य दिएको छ ।

त्रिभुवन विश्वविद्यालयको क्रिकेट मैदानमा टस जितेर पहिले ब्याटिङ गरेको एमसीसीले ३९ ओभर २ बलमा अलआउट हुँदै २ सय १ रन बनाएको हो ।

एमसीसीका विल रोड्स र विलि गोडलम्यानले अर्धशतकीय इनिङ्स खेले । जसमा रोड्सले ५४ रन जोड्दा गोडलम्यानले ५२ रन बनाए भने विल भेन्डेस्पर ३६ तथा क्यालम ज्याक्सन र एलेक्स थोमसनले समान ११ रन बनाए ।

घरेलु टोलीका तर्फबाट युवा क्रिकेटर पवन सर्राफ र ललित नारायण राजवंशीले उत्कृष्ट बलिङ गरे । जसमा उनीहरु दुवै जनाले समान ४–४ विकेट लिए ।

एमसीसीविरुद्ध नेपाल नयाँ कप्तान ज्ञानेन्द्र मल्लको नेतृत्वमा मैदान उत्रिएको छ । ज्ञानेन्द्र स्थायी कप्तानको रुपमा नियुक्त भएपछि पहिलो पटक नेपाली टिमको नेतृत्व गर्न लागेका हुन् ।

तर, एमसीसीविरुद्ध नेपालका मुख्य तीन खेलाडी मैदान उत्रिएनन् । राष्ट्रिय टोलीका निर्वतमान कप्तान पारस खड्का, सन्दीप लामिछाने र सोमपाल कामी एमसीसीसँगको टोलीमा थिएनन् । एकदिवसिय खेलमा तीनै जना खेलाडीले यसअघि खेल्ने भने पनि आज भने मैदानमा देखिएनन् ।