काठमाडौं– नेपालका लागि अमेरिकी राजदूत र्‍याण्डी बेरीले इण्डो प्यासिफिक रणनीतिमा नेपाल सहभागी गराउन आफूहरुले केही प्रयास नगरेको बताएका छन् ।

शुक्रवार सत्तारुढ दल नेपाल कम्युनिस्ट पार्टी नेकपाका वरिष्ठ नेता एवं पूर्व प्रधानमन्त्री झलनाथ खनासँगको भेटमा राजदूत बेरीले इण्डो प्यासिफिक रणनीति कुनै सैन्य संगठन नभएको भन्दै नेपाललाई यसमा सहभागी गराउन कुनै प्रयास नगरेको बताए ।

‘इण्डो प्यासिफिक रणनीति कुनै राजनीतिक मोर्चा होइन’ बेरीको भनाइ उदृत गर्दै नेता खनालले भने,‘यो सैन्य संगठन पनि होइन । नेपाललाई यसमा ल्याउनका लागि हामीले प्रयास गरेका छैनौं भन्नुभयो ।’

अमेरिककी राजदूत बेरीले नेपाललाई अमेरिकाले सहयोग जारी गर्न चाहेको र खासगरी देशमा स्थायित्व स्थापना भएकोले अमेरिकाको सहयोगलाई विस्तार गर्न तयार रहेको बताएका थिए ।

पूर्व प्रधानमन्त्री खनालले अमेरिकाको निर्सत सहयोगलाई स्वागत गरीने र यसबाट नेपालको विकासमा फाइदा पुग्ने बताएको खनालको सचिवालयबाट जारी गरिएको विज्ञप्तिमा उल्लेख गरिएको छ ।  ।

विगत लामो समय देखि भई आएको अमेरिकी सहयोगको लागी धन्यवाद दिँदै अब थप सहयोगको साथै लगानी समेत बृद्धि कुरामा आफु विश्वस्त रहेको खनालले बताएका थिए ।

राजदूत बेरीले एमसीसी (मिलेनियम च्यालेन्ज कम्प्याट) सम्झौताले नेपालको पूर्वाधार विकास गर्न खास गरी विद्युत प्रसारण र सडक सुधार आयोजनामा सहयोग पुग्ने बताए । उनले यसमा कुनै सामरिक स्वार्थ नभएको उल्लेख गरे ।