एल बि मगर

रोल्पा– रोल्पाको होलेरीमा लामो समयदेखि भुस्याहा कुकुरहरूको आतंक रहेको छ ।

होलेरी बजारका विभिन्न ठाँउमा भुस्याहा कुकुरहरूले बजामा आउने मानिसहरुलाई टोक्ने मात्र होइन डिउटिमा रहेका प्रहरीलाई नै टोक्न थालेका छन् ।

केही समय अगाडि बजारमा घुम्न आएका गाउँले र डिउटिमा रहेका प्रहरीलाई भुस्याहा कुकुरले टोक्केको थियो । त्यसबेला स्थानीय प्राथमिक स्वास्थ केन्द्रमा रेबिज विरुद्धको भ्याक्सिन नहुँदा समस्या परेको थियो ।

भुस्याहा कुकुरहरुका कारण बजार आउने जो कोहिलाइ स्वतन्त्र रूपमा हिँडडुल गर्न सहज नभएको स्थानीयको गुनासो छ । स्थानीयको अनुसार रातको समयमाबजारमा हिँड्न र गाउँ घरमा कोही बिरामी भएमा बजारको अस्पताल लैजान अत्यन्त कठिनाइ हुने बताएका छन् ।

यति मात्र होइन बजारमा दिन प्रतिदिन भुस्याहा कुकुरहरूको संख्या बढन थालेपछि बजारको बीचमा रहेको शहिदमार्ग हुँदै दैनिक आवत जावत गर्ने सवारी साधनहरुमा समेत बाधा पुग्न थालेको छ ।

बजारमा भुस्याहा कुकुरहरूको आतंक नियन्त्रणका लागी प्रशासनसँग स्थानीयले आग्रह नगरेका होइनन् तर अहिलेसम्म त्यसको सम्बोधन हुन सकेको छैन ।