अभिनेत्री केकी अधिकारी यतिबेला चर्चामा छिन् । उनी अभिनित चलचित्र ‘छ माया छपक्कै’ असोज २४ गतेदेखि प्रदर्शनमा आउँदैछ । चलचित्रमा केकीको जोडी दीपकराज गिरीसँग हुनेछ ।

म्युजिक भिडियोमा समेत व्यस्त केकी सुन्दरताका कारण पनि चर्चामा रहने गर्छिन् । व्यापारिक हिसाबले चलचित्र असफल भए पनि उनको अभिनयको भने तारिफ हुने गर्छ । केकी सामाजिक सञ्जालमा पनि उत्तिकै सक्रिय रहने गर्छिन् ।

बेलाबेलामा देशको राजनैतिक र समसामयिक विषयमा समेत आफ्नो अभिव्यक्ति दिने कारण केकी सचेत नायिकाका रुपमा पनि चिनिन्छिन् ।

सुन्दरता र अभिनयका कारण लाखौँ फ्यान कमाएकी केकी ‘छ माया छपक्कै’ पछि चलचित्र ‘झिंगे दाउ’ मा देखिनेछिन् । यो फिल्मको कथाले आफूलाई लोभ्याउने बताउँछिन् केकी ।

नायिकासँगै फिल्म मेकिङमा समेत व्यस्त केकी पछिल्लो समय निकै व्यस्त छिन् । उनी यही क्षेत्रमा सधै सक्रिय रहन सकियोस् भनेर चलचित्र मेकिङमा समेत लागेको बताउँछिन् ।

रिलिजको क्रममा रहेको चलचित्र ‘छ माया छपक्कै’ बाट आशावादी केकी भन्छिन् – ‘यो फिल्म मेरा लागि महत्त्वपूर्ण किन पनि छ भने यो फिल्ममार्फत धेरै दर्शकमाझ पुग्न सक्छु ।’

तस्वीरहरू: अदीप श्रेष्ठ