पञ्जाब– भारतमा एक पटाका कारखानामा विष्फोट हुँदा कम्तीमा १९ जनाको ज्यान गएको छ । भारतको पञ्जाब राज्यस्थित गुरदासपुर भन्ने स्थानमा पटाका कारखानामा विष्फोट भएको भारतीय सञ्चारमाध्यमले जनाएका छन् ।

विष्फोटमा परी अरु दर्जनौं घाइते भएको र घाइतेमध्ये धेरैको अवस्था गम्भीर रहेको भारतीय अधिकारीले जनाएका छन् । बुधबार ४ बजे आसपास विष्फोट भएको र विष्फोटन भएका बेला नजिकै रहेका मानिसहरु समेत आतंकित बनेको भारतीय सञ्चारमाध्यमले जनाएका छन् ।

विष्फोटनका कारण कारखाना नजिकै रहेका दुई भवन भत्केका छन् । भवन भत्किँदा ५० जनाभन्दा धेरै फसिरहेको हुनसक्ने र उनीहरुको उद्धार तथा खोजीकार्य भइरहेको छ । यद्यपि धुवाँको मुस्लोका कारण फसेका हुनसक्ने आशंका गरिएकाहरुको खोजी तथा उद्धारकार्य प्रभावित बनेको छ ।

पटाका कारखानामा विष्फोटको कारण खुल्न नसकेको जनाइएको छ । उक्त पटाका कारखाना वैध वा अवैध रहेको भन्ने पनि स्पष्ट नरहेको र यसबारे अनुसन्धान भइरहेको छ ।