वीरगन्ज– पर्सा प्रहरीले गोली प्रहार गरी अपराधिक समूहका एक व्यक्तिलाई पक्राउ गरेको छ ।

कर्तव्य ज्यान मुद्दामा कैद सजाय भुक्तान गरी छुटेका फुल हसन अंसारीको समूहका व्यक्ति हतियारसहित पक्राउ परेका प्रहरीले जनाएको छ ।

प्रहरीका अनुसार पक्राउ पर्नेमा पर्साको वीरगन्ज महानगरपालिका–१६ इनर्वा बस्ने सत्यराज योगी भनेर चिनिने सन्तोष दास तत्मा छन् ।

प्रहरीका अनुसार मंगलबार राति ९ः४० बजेतिर योगीले ड्युटीमा रहेका प्रहरीतर्फ हतियार ताकेर भागेका थिए ।

प्रहरीले योगीलाई गोली हानेर नियन्त्रणमा लिएको हो । जिल्ला प्रहरी कार्यालय पर्साले योगीको दाहिने खुट्टामा गोली लागेको जनाएको छ ।

अहिले उनको वीरगन्जस्थित नारायणी अस्पतालमा उपचार भइरहेको प्रहरीले जनाएको छ ।

योगीको साथबाट टाइप–५४ मोडेलको जस्तो देखिने १ थान पेस्तोल र त्यसमा लाग्ने १७ राउण्ड गोली बरामद भएको प्रहरीले जनाएको छ । प्रहरीका अनुसार उनको साथबाट खैरो हेरोइन जस्तो देखिने धूलो पदार्थ १७० ग्राम समेत बरामद भएको छ ।