काठमाडौं– नेकपाका नेता वामदेव गौतम प्रधानमन्त्री केपी शर्मा ओलीलाई भेट्न सिंगापुर जाने भएका छन् ।

नेकपाका प्रस्तावित उपाध्यक्षसमेत रहेका गौतम बुधबार दिउँसो १ बजे सिल्क एयरबाट सिंगापुर प्रस्थान गर्नेछन् ।

‘सांगठनिक छलफलका लागि भन्दै प्रधानमन्त्री ओलीले पुनः सिंगापुरमा बोलाउनु भएपछि वामदेव गौतम त्यसतर्फ जान लाग्नु भएको हो’ वामदेव निकट श्रोतले खबरहबसँग भन्यो ।  गौतम प्रधानमन्त्रीसँग स्वदेश फर्कने छन् ।

यसअघि पार्टी महासचिव विष्णु पौडेलसँगै गौतम सिंगापु जाने तयारीमा थिए तर अन्तिम समयमा हिजोको उनको कार्यक्रम स्थगित भएको थियो ।

प्रधानमन्त्रीको स्वास्थ्य

सिंगापुरमा उपचार गराईरहेका प्रधानमन्त्री केपी शर्मा ओलीको स्वास्थ्य रिपोर्ट आज आउने भएको छ । प्रधानमन्त्रीको स्वास्थ्य रिपोर्ट आएपछि उनी कहिले नेपाल फर्कने भन्ने तय हुने छ ।

प्रधानमन्त्री ओलीको शरीरमा एन्टिबडीको मात्रा बढ्दै गएपछि भदौ ५ गते उनी सिंगापुर प्रस्थान गरेका थिए । प्रधानमन्त्री ओलीको शरीरमा भएको एन्टिबडीलाई निस्काशन गर्न ७ पटक प्लाज्मा फेरेसिसस गर्नुपर्ने उनका निजी चिकित्सकहरुले बताएका थिए ।

प्रधानमन्त्री ओलीको शरीरमा बढेको एन्टिबडी निराकरणका लागि हालसम्म ६ पटक प्लाज्मा फेरेसिस भइसकेको छ । अब बुधबार(आज) सातौं पटक प्लाज्मा फेरेसिस गरिने र त्यसको रिपोर्ट आएपछि एन्टिबडीको अवस्था बारे जानकारी हुनेछ ।