एजेन्सी– अमेरिकाको ओहायो राज्यमा बन्दुकधारीले अन्धाधुन्ध गोली चलाउँदा ९ जनाको ज्यान गएको छ । टेक्सस राज्यको एल पासो शहरमा गोली चल्दा २० जनाको ज्यान गएको केही घण्टा लगत्तै ओहायो राज्यको डेयटन शहरमा बन्दुकधारीले गोली चलाएको हो ।

बन्दुकधारीले डेयटन शहरको एक बार अगाडी गोली चलाउँदा अरु १६ जना घाइते भएको अधिकारीहरुले जनाएका छन् । आइतबार बिहान सवा तीन बजे बन्दुकधारीले जथाभावी गोली चलाएको अमेरिकी सञ्चारमाध्यमले जनाएका छन् ।

प्रहरी अधिकारीले गोलीकाण्डमा बन्दुकधारीको समेत ज्यान गएको जनाएका छन् । अहिले प्रहरीले अवस्थालाई नियन्त्रणमा लिएको र त्यस वरपरका मानिसहरुलाई सतर्क रहन आह्वान गरेको छ । अमेरिकाको संघीय जाँच ब्यूरो एफबीआईले यसबारे अनुसन्धान गरिरहेको जनाएको छ ।

बन्दुकधारी उक्त बारभित्र प्रवेश गर्न खोजेको तर बारको भित्रबाट ढोका बन्द गरिएपछि ती व्यक्ति भित्र पस्न नपाएको अमेरिकी सञ्चारमाध्यमले जनाएका छन् । आक्रमणको उद्देश्यबारे अनुसन्धान भइरहेको बताइएको छ । बन्दुकधारीको पहिचानबारे कुनै विवरण सार्वजनिक भइसकेको छैन ।

ओहायो राज्यको डेयटनमा गोली चल्नु केही घण्टाअघि मात्र टेक्सस राज्यको एल पासो शहरमा बन्दुकधारीले गोली चलाउँदा २० जना मारिएका थिए । एल पासो शहरमा रहेको वालमार्ट स्टोरमा भएको आक्रमणमा संलग्नलाई भने प्रहरीले नियन्त्रणमा लिएको थियो ।

डेयटनमा भएको घटना र एल पासोमा भएको घटना एक अर्कासँग सम्बन्धित रहे/नरहेको बारे अनुसन्धान भइरहेको जनाइएको छ ।