रुकुम– हतियाारसहित लुटपाट मच्चाउँने समूहलाई प्रहरीले नियन्त्रणमा लिएको छ । हतियारसहित रहेका उनीहरुलाई नियन्त्रणमा लिन ५ राउण्ड हवाई फायर गर्नुपरेको जिल्ला प्रहरी कार्यालयले जनाएको छ ।

उनीहरुलाई रुकुम पश्चिम चौरजहारी नगरपालिका वडा नं.३ स्यालखोला भन्ने स्थानमा उनीहरुलाई नियन्त्रणमा लिईएको हो । प्रक्राउ पर्नेमा बाँके कोहलपुर नगरपालिका १ कौशिलानगरका गोरे थापा मगर र दैलेख दुल्लु नगरपालिका वडा नं.१३ लम्स बस्ने बर्ष ३४ का खड्कबहादुर बिक छन ।

उनीहरुको साथबाट कटुवा पेस्तोल जस्तो देखिने सानो हतियार थान एक र भरुवा बन्दुकलाई मिडियम साईजको कटुवा पेस्तोल बनाएको नाल एक बरामत गरिएको जिल्ला प्रहरी कार्यालय रुकुम पश्चिमका प्रमुख सुमित खड्काले जानकारी दिए ।

जिल्लाको चौरजहारी नगरपालिकाको वडा एरियामा केही दिन यता अबैध हात हातियार सहितको समुह सक्रिय रहेको सुनेपछि प्रहरीले निगरानी बढाएको थियो । यो समुहले डोल्पा, जाजरकोट र रुकुम पश्चीमबाट जडिबुटी तथा यार्सा गुम्बा खरिद बिक्रीको लागी आउने जाने ब्यापारी लगायत स्थानीय व्यक्तिलाई हातहतियार देखाई बिभिन्न डर धम्की दिई चन्दा तथा फिरौती र लुटपात गर्दै अशान्ति फैलाई त्रास मच्याउदै आएपछि प्रहरी एक्सनमा उत्रिएको हो ।

प्रहरीले पाएको गोप्य सुचनाको आधारमा उनीहरुलाई पक्राउ गरिएको हो । गस्तीका क्रममा शंकास्पद रुपमा हिडिरहेका उनीहरुलाई चेकजाँच गर्दा भाग्न खोजेपछि नियन्त्रणमा लिएको प्रहरीले जनाएको छ ।