काठमाडौं – चेल्सीका पूर्व मिडफिल्डर फ्याङक लाम्पार्ड तीन वर्षका लागि चेल्सीको मुख्य प्रशिक्षकमा नियुक्त भएका छन् । बिहीबार लाम्पार्डले चेल्सीसँग ३ वर्षे सम्झौता पत्रमा हस्ताक्षर गरेका हुन् ।

४१ वर्षीय लाम्पार्डले १३ वर्ष खेलाडीका रुपमा चेल्सीमा विताएका थिए । केही समय अगाडि चेल्सीका प्रशिक्षक माउरिजियो सारी इटालियन क्लब युभेन्टस गएपछि लाम्पार्डले चेल्सीमा मुख्य प्रशिक्षकको जिम्मेवारी पाएका हुन् ।

इंग्ल्यान्ड राष्ट्रिय फुटबल टोलीका पूर्व खेलाडी लाम्पार्डले चेल्सीका लागि ६ सय ४८ खेल खेलेका थिए । जसमा उनले ११ वटा उपाधि चेल्सीलाई दिलाए । उनले क्लबमा प्रशिक्षकका रुपमा फर्किन पाउँदा गर्व महसुस भएको बताएका छन् ।

‘मलाई गर्व महसुस भइरहेको छ कि म आज चेल्सीको मुख्य प्रशिक्षकमा रुपमा फर्किइरहेको छु,’ लाम्पार्डले भने,‘हरेकलाई थाहा छ यो क्लबलाई म कति माया गर्छु भन्ने कुरा र इतिहास जुन हामीले आदान प्रदान गरेका थियौं । यद्यपी म मेरो काममा ‘फोकस’ हुन्छु र आगामि सिजनका लागि टिमलाई तयार गर्छु ।’

लाम्पार्डले यो सिजनमा क्लबलाई राम्रो स्तरमा पुर्‍याउने योजनासहित केही दिन भित्रै अभ्यास शुरु गरिहाल्ने बताएका छन् ।