काठमाडौं– अख्तियार दुरुपयोग अनुसन्धान आयोगले कालीकोटको राम्नाकोटस्थित जनता माध्यमिक विद्यालयका तत्कालीन प्रधानाध्यापक जयलाल न्यौपानेविरुद्ध भ्रष्टाचार मुद्दा दायर गरेको छ ।

तत्कालीन प्रधानाध्यापक न्यौपानेले २०७० मंसिरदेखि २०७२ भाद्रसम्म शिक्षकको तलब, विद्यार्थीको छात्रबृत्ति, दिवा खाजा तथा विद्यालय भवनको निर्माण गर्ने ज्यामिका ज्यालाबापतको रकम हिनामिना गरेको आरोपमा अख्तियारले उनीविरुद्ध विशेष अदालतमा भ्रष्टाचार मुद्दा दायर गरेको हो ।

अख्तियारका अनुसार तत्कालीन प्रधानाध्यापक न्यौपानेले विद्यालयका लेखापालको हस्ताक्ष किर्ते गरी विद्यालयको खाताबाट रकम झिकि अनियमितता गरेका हुन् । न्यौपानेले विद्यालयको खाताबाट १७ लाख ४६ हजार ७ सय ३१ रुपैयाँ झिकेका थिए । जसमध्ये ९ लाख १५ हजार खातामा जम्मा गरेकोमा बाँकी ८ लाख ३१ हजार ७ सय ३१ रुपैयाँ हिनामिना गरेको अख्तियारले जनाएको छ ।

अख्तियारले न्यौपानेविरुद्ध ८ लाख ३१ हजार ७ सय ३१ रुपैयाँ बिगो तथा जरिवाना र सजाय मागदावी गर्दै मंगलबार विशेष अदालत काठमाडौंमा मुद्दा दायर गरेको हो ।