फिलिपिन्स– दक्षिण चीन सागरमा हाल आफ्नो प्रशासनमा रहेको टापुनजिक अनुमतिबेगर चिनियाँ डुङ्गाहरु आउनु आफ्नो सार्वभौमिकताको विरुद्धमा रहेको फिलिपिन्सले जनाएको छ ।

बिहीबार फिलिपिन्सको विदेशमन्त्रालयले विज्ञप्ति जारी गर्दै दक्षिण चीन सागरमा अवस्थित फिलिपिन्समा पगासा भनिने थिटु टापुनजिक २ सयभन्दा धेरै चिनियाँ माछा मार्ने पानीजहाज आएको घटना अन्तर्राष्ट्रिय मान्यता अनुसार गैर कानूनी रहेको र आफ्नो सार्वभौमिकताको विरुद्धमा रहेको जनाएको हो ।

फिलिपिन्सको विदेशमन्त्रालयले विज्ञप्तिमा चिनियाँ डुङ्गाहरु त्यहाँ आउनुले चीनको नियतमा प्रश्न उठाएको र उनीहरु बलपूर्वक आफ्नो उद्देश्य पूरा गर्ने दाउमा रहेको स्पष्ट भएको उल्लेख गरेको छ ।

त्यस्तै, चीनसँग सम्बन्ध सुमधुर बनाउनुपर्ने नीतिका साथ सन् २०१६ मा फिलिपिन्सको राष्ट्रपतिमा निर्वाचित रोड्रिगो डुटेर्टेले भने चीनले फिलिपिन्ससँग मैत्रीपूर्ण सम्बन्ध स्थापना गर्न चाहेको प्रतिक्रिया दिँदै आएका छन् ।

उनले मंगलबार भनेका थिए, ‘चीनले फिलिपिन्सलाई बन्दुक र गोलीगठ्ठा दिँदै आएको छ र हालसम्म उसले फिलिपिन्सको कुनै भूभाग माग गरेको छैन ।’

फिलिपिनी सेनाको तथ्याङ्क अनुसार यो वर्षको शुरुदेखि मार्च महिनासम्म पगासा टापुमा २ सयभन्दा धेरै माछा मार्ने डुङ्गाहरु आएका थिए ।
अमेरिकी सेनाको पश्चिम प्रशान्त निर्देशनालयले ती डुङ्गाहरुलाई संदिग्ध सामुद्रिक लडाकुको संज्ञा दिएको थियो ।

दक्षिण चीन सागरको जलक्षेत्रमा चीन र फिलिपिन्ससहित ब्रुनाई, भियतनाम, इण्डोनेशिया, मलेशिया र अन्य मुलुकहरुले आ–आफ्नो सार्वभौमिकता दाबी गर्दै आएका छन् ।