भारत– भारतको विपक्षी दल काँग्रेस पार्टीका अध्यक्ष राहुल गान्धीले आसन्न आम निर्वाचनका लागि दक्षिण भारतको वायानाडबाट औपचारिक रुपमा उम्मेद्वारी दर्ता गराएका छन् ।

वायानाडमै पुगेर गान्धीले उम्मेद्वारी दर्ता गराएको काँग्रेस पार्टीका महासचिव के.सी. भेणुगोपालले जनाएका छन् ।

यसअघि काँग्रेस पार्टीले सार्वजनिक गरेको उम्मेद्वारको सूचीमा अध्यक्ष गान्धीले उत्तर प्रदेशको अमेठी निर्वाचन क्षेत्रबाट मात्र उम्मेद्वारी दिने उल्लेख थियो ।

अमेठीबाट उनले सन् २००४ यता हरेक चुनावमा विजयी हुँदै आएका छन् । अमेठीमा यसपटकको निर्वाचनमा उनको प्रतिस्पर्धा वर्तमान कपडामन्त्री स्मृति इरानीसँग हुँदै छ । यसअघि सन् २०१४ मा भएको निर्वाचनमा गान्धीले इरानीलाई एक लाख भन्दा धेरै मतले पराजित गरेका थिए ।

तर, आफ्नो नेता कार्यकर्ता र समर्थकको आग्रह र मागबमोजिम गान्धीले दक्षिण भारतबाट पनि उम्मेद्वारी दिएको काँग्रेस पार्टीले जनाएको छ ।
भारतको सत्तारुढ भारतीय जनता पार्टी भाजपाले भने काँग्रेस अध्यक्ष गान्धी एक ठाउँबाट चुनावमा विजयी हुनेमा ढुक्क हुन नसकेको र अमेठीबाट डराएर दक्षिण भारतमा चुनाव लड्न जान लागेको आरोप लगाएको छ ।

भारतमा आगामी अप्रिल ११ बाट विभिन्न ७ चरणमा मे १९ सम्म आम निर्वाचन हुँदैछ ।