काठमाडौं – ‘ऐश्वर्य’ गर्ल दीपिका प्रसाईंले फिल्म ‘हेलो जिन्दगी’ मा अभिनय गर्ने भएकी छिन् । फिल्म ‘ऐश्वर्य’ बाट नेपाली रजतपटमा डेब्यु गरेकी दीपिकाले यसपछि फिल्म ‘छक्का पञ्जा ३’ मा पनि मुख्य भूमिका निभाएकी थिइन् । पारिवारिक कारण देखाउँदै उनले बीचमा अफर आएका फिल्ममा साइन गरेकी थिइनन् ।

आउँदो वर्षको शुरुवातमा निर्देशक दिवाकर भट्टराईसँग विवाह बन्धनमा बाँधिन लागेकी यी नायिका यतिबेला भने फिल्म ‘हेलो जिन्दगी’ मा अनुबन्ध भएकी छिन् । स्रोतका अनुसार उनले यो फिल्मका लागि दश लाखको हाराहारीमा पारिश्रमिक लिएको बताइएको छ ।

निर्देशक एभरेस्ट सूर्य बोहराले फिल्मको छायांकन बेलायतमा हुने बताएका छन् । यो फिल्ममा अर्की नायिका स्वेता खड्काको पनि इन्ट्री भइसकेको छ । यद्यपि मुख्य अभिनेता को हुने भन्ने अझै तय भएको छैन ।

छिट्टै नै छायांकनका लागि बेलायत जाने बताइएको यो फिल्ममा सलोन बस्नेत, विल्सन विक्रम राई, विक्रान्त बस्नेत लगायतका कलाकारको पनि अभिनय रहने जनाइएको छ ।

फिल्मलाई सिर्जना जोशीले निर्माण गर्नेछिन् भने छायांकन पुरुषोत्तम प्रधानको रहनेछ ।