काठमाडौं– सरकारी स्वामित्वमा रहेको जलविद्युत लगानी तथा विकास कम्पनी लिमिटेडले बारा र पर्साका हावाहुरी प्रभावितहरुका लागि ४ लाख रुपैयाँ राहतस्वरुप उपलब्ध गराएको छ ।

कम्पनीका प्रमुख कार्यकारी अधिकृत छबिराज पोखरेलले बिहीबार उर्जा, जलस्रोत तथा सिंचाई मन्त्री वर्षमान पुनको उपस्थितिमा प्रधानमन्त्री तथा मन्त्रिपरिषद कार्यालयका सचिव शिशिरकुमार ढंगानालाई सो राहत रकम हस्तान्तरण गरेका छन् ।

प्रधानमन्त्री राहत कोषमार्फत् बारा र पर्साका हावाहुरी प्रभावितहरुका लागि ४ लाख राहत रकम हस्तान्तरण गरिएको कम्पनीका प्रमुख कार्यकारी अधिकृत पोखरेलले बताए ।

उर्जा, जलस्रोत तथा सिंचाई मन्त्रालयका सचिव अध्यक्ष रहने सो कम्पनीको गत बुधबार बसेको बैठकले कम्पनीको सामाजिक उत्तरदायित्व कोषमा रहेको रकम बारा र पर्साको हावाहुरी प्रभावितलाई उपलब्ध गराउने निर्णय गरेको थियो ।

हालसम्म ३ अर्ब ९ करोड मुनाफा आर्जन गर्न सफल सो कम्पनीले राज्यलाई १ अर्ब ६५ करोड कर बुझाइसकेको जनाएको छ ।