काठमाडौं– काभ्रे सदरमुकाम धुलीखेलमा निर्माणाधीन एक घरको छतबाट खसेको रड लागेर घाइते भएका जनप्रतिनिधिको उपचारका क्रममा मृत्यु भएको छ ।

काभ्रेको महाभारत गाउँपालिकाको वडा नम्बर ३ का वडासदस्य देवीबहादुर ठाडामगरको सोमवार मृत्यु भएको हो ।

आइतवार निजी कामका लागि लागि सदरमुकाम धुलीखेल आउँदै गरेका ठाडामगर सरस्वती बजारस्थित निर्माणाधीन घरको छतबाट खसेको रडक लागेर गम्भीर घाइते भएका थिए ।

धुलीखेल–७ का सुवर्णकाजी श्रेष्ठको निर्माणाधीन घरको छतबाट रड खसेको थियो । घर निर्माणको जिम्मा ठेकेदार कृष्णराम अवालले लिएका थिए ।

टाउकोमा रड लागेर घाइते भएका ठाडामगरलाई आइतवारै धुलीखेल अस्पतालमा भर्ना गरिएको थियो ।

थप उपचारका लागि उनलाई सोमवार काठमाडौंस्थित नर्भिक अस्पतालमा ल्याइएको महाभारत गाउँपालिका–३ का वडाध्यक्ष ज्ञानबहादुर लामाले खबरहबलाई जानकारी दिए । लामाका अनुसार उपचारकै क्रममा सोमवार ५५ वर्षीय ठाडामगरको मृत्यु भएको हो ।