काठमाडौं– परोपकार प्रसूति तथा स्त्रीरोग अस्पतालले टेस्ट्युब बेसी सेन्टर सञ्चालन गर्न कुपण्डोलमा नयाँ भवन निर्माण गरेको छ ।

टेस्ट्युब बेबी सेवा संचालनका लागि अस्पतालले २८ करोड लागतमा भवन निर्माण सम्पन्न गरेको हो । तीनवर्षअघि निर्माण सुरु भएको भवन निर्माण सम्पन्न भइसकेको अस्पतालका निर्देशक जागेश्वर गौतमले बताए ।

‘कुपण्डोलमा २८ करोड लगानीमा प्रसूतिगृहको नयाँ भवन निर्माण भइसकेको छ । त्यहाँ हामीले नर्सिङ कलेज र टेस्ट्युब बेबी सेवा संचालन गछौं,’ डा. गौतमले भने, ‘अहिले टेस्ट्युब बेबी सेवा संचालनका लागि आवश्यक पर्ने उपकरणहरु जडान गर्ने प्रक्रियामा छौं,उपकरणहरु जडान गरीसकेपछि सेवा सुरु गछौं ।’

नयाँ बनेको भवनमा नर्सिङ पढाइ भने सुरु भइसकेको गौतमको भनाइ छ । त्यहा अहिले न्याम्सअन्तरगर्तका १ सय २० जना नर्सिङका विद्यार्थीहरु अध्ययनरत छन् ।

थापाथलीमा रहेको भवनमा ठाउँअभाव भएपछि अस्पतालले विगत ८ महिनादेखि टेट्युब बेबी सेवा दिन सकिरहेको छैन ।