६ महिना पुरा भएपछि बालबालिकालाई आमाको दूधबाट मात्र पोषक तत्वहरु पुग्दैन । त्यसैले ६ महिना पुरा भएका बालबालिकाहरुलाई आमाको दूधसँगै थप खाना पनि खुवाउनुपर्छ ।

बालबालिकालाई थप खाना खुवाउँदा उसको उमेर, पटक, मात्रा, बाक्लोपन, सरसफाई र सक्रियता समेतमा पनि ख्याल गर्नुपर्छ ।

कति उमेरकालाई के खुवाउने ?

६ देखि ९ महिनासम्मः ६ देखि ९ महिनासम्मका बालबालिकालाई आमाको दूधसँगै दिनमा ३ पटक थप खाना खुवाउनु पर्दछ । खाना शुरु गर्दा २ देखि ३ चम्चाबाट शुरु गर्नु पर्दछ ।

९ देखि १२ महिनासम्मः ९ देखि १२ महिनासम्मको बालबालिकालाई आमाको दूधका साथै दिनमा ३ पटक पूरक वा थप खाना र एक पटक खाजा खुवाउनु पर्दछ । खाजामा केरा, अण्डा जस्ता खानेकुरालाई समावेश गर्नु पर्दछ ।

१२ देखि २४ महिनाः १२ देखि २४ महिनाको बालबालिकालाई आमाको दूधका साथै दिनमा ३ पटक पूरक खाना र २ पटक खाजा खुवाउनु पर्दछ ।

हरेक दिनको थप खानामा पनि अन्न वा कन्दमूल, गेडागुडी,तेलहन, पशुपंक्षिजन्य श्रोतका खानेकुरा जस्तै दूध तथा दूग्ध पदार्थ, माछारमासु, अण्डा, र हरियो सागपात र फलफूल समूह मिलाएर खुवाउनु पर्दछ ।

लिटो, जाउलो, गहुँ, कोदो, मकै, फापर, दाल, पालुङ्गो, मिचेको केरा, तरबुजा र खरबुजा, मेवा, स्याउ र मिचेको काउली, गाजर, आलु, सखरखण्ड, फर्सीजस्ता विभिन्न प्रकारका तरकारी, अण्डा, माछा, मासु आदि खुवाउनु पर्दछ ।