एजेन्सी– भ्रष्टाचारको अभियोगमा दोषि प्रमाणित भएर १२ वर्षको जेल सजाय भोगिरहेको ब्राजिलका पूर्व राष्ट्रपति तथा प्रभावशाली बामपन्थी नेता लुला डा सिल्भा आफ्नो नातिको अन्तिम संस्कारमा सहभागि भएर जेल फर्केका छन् ।

गत शुक्रबार मेनेन्जाइटिस रोगका कारण ७ वर्षे नातिको मृत्यु भएपछि उनलाई अन्तिम संस्कारमा सहभागि हुन जेलबाट केही समयका लागि मुक्त गरिएको थियो ।

साओ पाउलो शहरमा उनी सहभागि भएको अन्तिम संस्कारमा उनका समर्थकहरुको ठूलो भीड थियो । उनले आफ्ना समर्थकमाझ आफूले कुनै गल्ती नगरेको र रजनीतिक पूर्वाग्रह साँध्न आफूलाई जेल हालिएको समेत जनाएका थिए ।

उनले आफ्ना नातिसँग स्वर्गमा भेट भएपछि आफू निर्दोष रहेको बताउने लुलाको भनाइ छ । साथै लुलाले आफू जेलमा रहँदा आफ्नो नातिमाथि लागेको ‘भ्रष्टाचारीको नाति’ को कलंक समेत स्वर्गमै मेटाउने समेत बाचा गरेका छन् ।

सन् २००३ देखि सन् २०१० सम्म ब्राजिलको राष्ट्रपतिको कार्यकाल सम्हालेका लुला भ्रष्टाचार, सम्पत्ति शुद्धिकरणलगायतका अभियोगमा दोषी ठहर भएपछि हाल भने उनी कुरिटिबा शहरको जेलमा जेलजीवन बिताइरहेका छन् । नातिको मृत्यु भएपछि भने अन्तिम संस्कारमा सहभागि हुन उनलाई जेलबाट केही समयका लागि मुक्त गरिएको थियो ।