पटना– भारतीय प्रधानमन्त्री नरेन्द्र मोदीले अब भारतले आफ्ना सैनिकको मृत्युलाई लिएर छानी छानी बदला लिने घोषणा गरेका छन् । आफ्नो चुनावी ¥यालीका क्रममा बिहारको राजधानी पटनामा सम्बोधन गर्दै प्रधानमन्त्री मोदीले आफ्ना वीर सैनिकको मृत्युको बदला लिइने घोषणा गरेका हुन् ।

नयाँ नीति र नयाँ रीतिमा भारत अघि बढिरहेको भन्दै प्रधानमन्त्री मोदीले आफू आतंकवादविरुद्ध निरन्तर लागिरहने समेत जनाए ।

पटनाको गान्धी मैदानमा सम्बोधनका क्रममा उनले विपक्षी पार्टीहरुले भने पाकिस्तानको बालाकोटमा भारतीय सेनाले गरेको कारवाहीको प्रमाण मागेर भारतीय सेनाको क्षमतामा प्रश्न उठाइरहेको समेत आरोप समेत लगाए ।

मोदीले अहिले पूरै भारत एकजुट भएर आतंकवादको विरुद्धमा लाग्नुपर्ने बेला विपक्षी पार्टीहरु भने केन्द्र सरकारले आतंकवादविरुद्ध चालेका कदमको विरोध गरिरहेको आरोप पनि लगाए ।

‘उनीहरुलाई भारतीय सेनाको पराक्रममाथि नै शंका छ,’ मोदीले भने ‘तर, सबैलाई थाहा भएकै कुरा हो, भारतको सक्षम सेना आतंकवादलाई कुल्चन जुटिरहेका छन् ।’

उनले विपक्षी पार्टीहरुमाथि आफूलाई च्युत गर्ने षड्यन्त्र गरिरहेको आरोप लगाए । मोदीले भने ‘विपक्षी मोदीलाई पिछा छुटाउन चाहिरहेका छन्, तर म भने आतंकवादलाई कसरी परास्त गर्ने भन्ने चिन्तनमा छु ।’