मुम्बई – बलिउड अभिनेता सलमान खानको फिल्म ‘भारत’ को यतिबेला चौतर्फी चर्चा छ । यो फिल्मलाई लिएर दर्शक लामो समयदेखि प्रतीक्षामा छन् ।

यतिबेला भने यो फिल्मको शूटिङ सकिएको छ । निर्माता अतुल अग्निहोत्रीले फिल्मको छायांकन सकिएको बताएका छन् । साथै उनले एक भिडियो पनि सार्वजनिक गरेका छन् ।

शूटिङ सकिएको औपचारिक घोषणासँगै फिल्मको नयाँ टिजर र गीत रिलिज हुने आशा गरिएको छ ।

अतुलले इन्स्टाग्राममा सार्वजनिक गरेको भिडियोमा कटरिना कैफ, सुनील ग्रोबर लगायतलाई देख्न सकिन्छ ।

फिल्म पोस्ट प्रोडक्सनमा पुगिसकेको छ । फिल्मका निर्देशक अब्बास जफर र सलमान खानले यसअघि ‘सुल्तान’ र ‘टाइगर जिन्दा है’ मा एकसाथ काम गरिसकेका छन् ।

यो फिल्ममा सलमान खानले १८ वर्षदेखि ६० वर्षको वृद्धको भूमिका निभाउँदै छन् । फिल्म कोरियन फिल्म ‘अड टु माइ फादर’ को हिन्दी रिमेक हो ।

फिल्म इदको मौका पारेर सन् २०१९ मै रिलिज हुँदैछ ।