भोजपुर– प्रहरीले विभिन्न समयमा देशव्यापी रुपमै लागू औषध नियन्त्रण गर्ने भनेर गाँजा फडानी गर्ने अभियान चलाउने गरेको छ ।

लागू औषधको प्रयोगलाई निरुत्साहित पार्ने भनेर प्रहरीले विभिन्न समयमा यस्तो अभियान चलाउँदै आएको छ । प्रहरीले बारीमै पुगेर गाँजा फडानी गर्ने गरे पनि स्थानीय जनताले भने गाँजा खेती गर्न छाडेका छैनन् ।

यस्तै, अभियान भोजपुर प्रहरीले पनि सञ्चालन गरेको छ । भोजपुरका प्रहरी प्रमुख प्रहरी नायव उपरीक्षक (डिएसपी) नरबहादुर सलामी मगर नै गाँजा फडानी गर्न बारीमा निस्किएका छन् ।

भोजपुर प्रहरीले सार्वजनिक गरेको तस्वीरमा डिएसपी मगर खुकुरी बोकेर गाँजाको बारीमा देखिन्छन् ।

भोजपुर प्रहरीका अनुसार उक्त अभियानका दौरान जिल्लाको हतुवागढी गाउँपालिका–९ अन्तर्गतको विभिन्न ठाउँमा गरी १२ हजार ५ सय बोटको संख्यामा गाँजा नष्ट गरिएको छ ।