काठमाडौं– सत्तारुढ नेपाल कम्युनिस्ट पार्टी (नेकपा)ले सचिवालय सदस्यहरुको बैठक डाकेको छ ।

नेकपाले आइतबार साँझ ५ बजेका लागि प्रधानमन्त्रीको सरकारी निवास बालुवाटारमा सचिवालय बैठक डाकेको हो ।

नेकपा प्रवक्ता तथा सचिवालय सदस्य नारायणकाजी श्रेष्ठले साँझ ५ बजेका लागि सचिवालय बैठक बोलाइएको बताए ।

नेता श्रेष्ठका अनुसार आगामी मंसिर १४ गते हुने उपनिर्वाचनका लागि उम्मेदवार तोक्ने विषयमा छलफल गर्न सचिवालय बैठक बोलाइएको हो ।

उपनिर्वाचनअन्तर्गत प्रतिनिधिसभा र प्रदेशसभा सदस्यका लागि उम्मेदवारको मनोनयन दर्ता गर्ने नजिकिँदै गर्दा नेकपाले उम्मेदवार तोक्ने तयारी शुरु गरेको हो ।

उपनिर्वाचन हुने जिल्ला तथा क्षेत्रबाट पार्टीका कमिटीले संभावित उम्मेदवारको सूची पठाइसके पनि केन्द्रबाट भने निर्णय हुन सकेको छैन ।

आइतबार साँझको बैठकले उपनिर्वाचन हुने ठाउँका प्रतिनिधिसभा, प्रदेशसभा, स्थानीय तहका प्रमुख–उपप्रमुख तथा वडाध्यक्षका लागि उम्मेदवार तोक्ने प्रवक्ता श्रेष्ठको भनाइ छ ।