काठमाडौं- नेपाली कांग्रेसका नेता डा शेखर कोईरालाले महिला संघ डडेल्धुराकी सभापतिलाई विनाकारण हटाउने निर्णय तत्काल फिर्ता लिन पार्टी नेतृत्वलाई आग्रह गरेका छन्।

कांग्रेस केन्द्रीय समिती बैठकमा बोल्दै डा कोईरालाले स्पस्टीकरण समेत नसोधी अधिवेशन गर्न नसकेको भन्दै हटाएर पार्टी भित्र गलत नजिर बसाउन खोजेको बताए ।

‘केन्द्रीय अधिवेशन गर्न नसक्ने कतिजना सभापतीहरु छन् ? त्यसो भए तिनलाई चाहिँ किन नहटाएको ?’ डा कोईरालाले भने– ‘सभापतिज्यू तुरुन्तै महिला संघकी केन्द्रीय अध्यक्षलाई डडेल्धुरा अध्यक्ष माथिको कारबाही फुकुवा गर्न आदेश दिनोस्।’

डडेल्धुरा महिला संघको घटनाले देशभरका कार्यकर्तामा निरासा छाएको बताउँदै डा कोईरालाले विधि, विधान र पद्दतिबाट पार्टी नेतृत्व नहिंडेकै कारण पार्टी कमजोर हुँदै गएको बताए।

विनाकारण डडेल्धुरा महिला संघकी अध्यक्षलाई हटाउने निर्णय कुनै पनि हालतमा मान्न नसकिने जिकिर पनि डा कोइरालाले गरे।

महिला संघकी केन्द्रीय अध्यक्ष उमा रेग्मीले विनाकारण डडेल्धुराकी अध्यक्ष कमला बिष्टलाई साधारण सदस्य पनि नरहने गरी हटाएकी थिइन्।