काठमाडौं– नागार्जुन नगरपालिका–५ बस्ने २५ वर्षीय आकाश बस्नेतलाई धारिलो हतियार प्रहार गरी ज्यान लिएको अभियोगमा प्रहरीले तीन जालाई पक्राउ गरेको छ ।

पक्राउ पर्नेहरूमा काठमाडौं नागार्जुन नगरपालिका–४ सितापाईला शरणपुर बस्ने सुर्खेत वीरेन्द्रनगर नगरपालिका–१ बाङ्गेसिमल घर भएका १९ वर्षीय हिमांशु क्षेत्री, धादिङ गजुरी गाउँपालिका–२ का २० वर्षीय शाकार भनिने सागर तामाङ र दोलखा मेलुङ्ग गाउँपालिका–५ डाँडाखर्क घर भएका २३ वर्षीय सरोज भन्ने सुवाश श्रेष्‍ठ रहेको प्रहरीले जनाएको छ ।

महानगरीय प्रहरी वृत्त स्वयम्भूबाट खटिएको प्रहरीले टोलीले घटना भएको भएको करिब आधा घण्टाभित्रै उनीहरूलाई काठमाडौं नागार्जुन नगरपालिका–४ स्थित कम्फर्ट कोलनीबाट नियन्त्रणमा लिएको हो । उनीहरुलाई आवश्यक कारबाहीका लागि अनुसन्धान जारी रहेको प्रहरीले जनाएको छ ।

काठमाडौं नागार्जुन नगरपालिका–४ सितापाईलास्थित शरणपुरचोकमा झै–झगडा भएको भन्‍ने जानकारी प्राप्त हुनसाथ स्वयम्भू वृत्तबाट खटिएको प्रहरीले बस्नेतलाई धारिलो हतियार प्रहारबाट घाइते भएको अवस्थामा फेला पारेको थियो ।

घाइते बस्नेतलाई उपचारका लागि मनमोहन अस्पताल स्वयम्भूमा पठाइएकोमा उनको उपचारको क्रममा ज्यान गएको थियो ।