काठमाडौं – असोज १० गतेबाट प्रदर्शनमा आउने चलचित्र ‘रातो टीका निधारमा’ को ट्रेलर सार्वजनिक गरिएको छ । हलमा केही दिनअघिदेखि नै प्रसारण भएको यो ट्रेलर युट्युबमार्फत मंगलबार सार्वजनिक गरिएको हो ।

ट्रेलरमा अंकित शर्मा र साम्राज्ञी राज्यलक्ष्मी शाहको शीर्ष भूमिका देख्न सकिन्छ । ट्रेलर अनुसार साम्राज्ञीले गाउँमै केही गर्न सकिन्छ भन्दै युवालाई चेतना जगाउन खोजेको देखाइएको छ भने अकिंतले गाउँमा भएका युवालाई फ्री भिसा फ्री टिकट भन्दै विदेश पठाएको देखाइएको छ ।

दशैँको रौनक झल्किने फिल्मको ट्रेलरमा बुद्धि तामाङ, बसुन्धरा भुसाल, नीता ढुंगाना, रविन्द्र झा, लक्ष्मी गिरी, अरुणा कार्की लगायतका कलाकारलाई पनि देख्न सकिन्छ ।

फिल्ममा अशोक शर्माको लेखन तथा निर्देशन रहेको छ भने किरण शर्मा र कृति शर्माको लगानी रहेको छ ।

यस्तै चलचित्रमा मित्र डी गुरुङको सम्पादन र पुरुषोत्तम प्रधानको छायांकन रहेको छ । यस्तै फिल्ममा खुश्बु खड्का, कमला रेग्मी, जयनन्द लामा, राजाराम पौडेल लगायतका कलाकारको पनि अभिनय देख्न सकिनेछ ।