देहरादून– भारतको दोश्रो अग्लो शिखर नन्दा देवी हिमाल आरोहणका क्रममा ज्यान गुमाएका ८ मध्ये ७ पर्वतारोहीको शव हेलिकोप्टरबाट ल्याइएको छ ।

उत्तराखण्ड राज्यमा पर्ने नन्दा देवी हिमालबाट उद्धारकर्ताले उनीहरुको शव नजिकैको शहर पिथौरागढ ल्याएको भारतीय सञ्चारमाध्यमले जनाएका छन् ।

गत मे महिनामा नन्दा देवी आरोहण लागि गएका ८ पर्वतारोही हिमपहिरोमा परेका थिए । हिमपहिरोमा परेका आरोही पर्वतको आधार शिविरतर्फ नपुगेकाले उनीहरुको मृत्यु भएको जनाइएको थियो । आरोहण दलमा ४ बेलायती, २ अमेरिकी तथा भारत र अष्टे«लियाका एक एक आरोही थिए ।

उद्धारकर्ताले ८ मध्ये ७ आरोहीको शव फेला पारेका थिए । प्रतिकूल मौसमका कारण आठौ शवको खोजीकार्य स्थगित गरिएको जनाइएको छ । शव फेला परेका मध्ये २ जनाको मात्र पहिचान भएको र अन्यको शव पहिचान हुन समय लाग्ने अधिकारीले जनाएका छन् । शवको पहिचान भइसकेपछि आफन्तलाई जिम्मा लगाइनेछ ।