टोकियो– जापानमा भारी वर्षापछि करिब २० लाखलाई सुरक्षित स्थानतर्फ जान निर्देशन जारी गरिएको छ ।

दक्षिण जापानको क्युशु टापुको कागोशिमा र मियाजाकी प्रान्तमा १० लाख २० हजारभन्दा धेरैलाई सुरक्षित स्थानमा सार्न निर्देशन जारी गरिएको हो । त्यसबाहेक ९ लाख ३० हजारलाई पनि सुरक्षित स्थानमा सर्न सल्लाह दिइएको छ । यद्यपि कति जना सुरक्षित स्थानतर्फ सरेका छन् भन्नेबारे केही खुलाइएको छैन ।

गत शुक्रबारबाट हालसम्म १ हजार मिलिमिटर वर्षा भएको र आगामी केही दिनमा योभन्दा भारी वर्षा हुने त्यहाँको मौसम विभागले जनाएको छ । भारी वर्षापछिको बाढी र पहिरोका कारण जनजीवन अस्तव्यस्त भएको जनाइएको छ ।

वर्षाका कारण क्युशु टापुका नदीको सतह बढेको र विशाल क्षेत्र डुबानमा परेको जापानको एनएचके समाचार संस्थाले जनाएको छ । अविरल वर्षापछि सुरक्षा निकाय र उद्धारकर्मीहरु मानिसहरुलाई सुरक्षित स्थानतर्फ सार्ने तयारीका लागि जुटेका बताइएको छ ।