काठमाडौं– सर्वोच्च अदालतले काठमाडौंको थापाथलीस्थित परोपकार प्रसूति तथा स्त्रीरोग अस्पताललाई सुत्केरी गराउँदा लापरवाही गरेको भन्दै पीडित पक्षलाई क्षतिपूर्ति दिन आदेश जारी गरेको छ ।

१३ वर्ष अगाडिको एक घटनाका सन्दर्भमा सर्वोच्चले पीडित पक्षलाई ५ लाख रुपैयाँ क्षतिपूर्ति दिन अस्पतालका नाममा आदेश जारी गरेको हो ।

२ चैत २०६३ मा प्रसूति गराउने क्रममा भ्याकुम प्रयोग गर्दा लापरवाही भएको भन्दै पीडित पक्षले स्थानीय प्रशासनमा उजुरी दिएका थिए ।

पीडित पक्षका अनुसार अस्पताल र चिकित्सकको लापरवाहीका कारण भ्याकुम प्रयोग गरेर प्रसूति गराउँदा नवजात शिशुको शरीरमा चोट लागेको, शरीरको बायाँ भाग नचल्ने भएको, अनुहार भित्र पसेको, नाक र निधारमा घाउ भएको, टाउको पछाडि फर्केको र बायाँ गोडा बाङ्गो भएको भन्दै जिल्ला प्रशासन कार्यालय काठमाडौंमा उजुरी दिएका थिए ।

पीडित पक्षले अस्पताल र चिकित्सकबाट ८२ लाखभन्दा बढी क्षतिपूर्ति दावी गरेको थियो । जिल्ला प्रशासन कार्यालयले भने अस्पतालले ५ लाख र चिकित्सकले ५ लाख क्षतिपूर्ति तिर्नुपर्ने फैसला गरेको थियो ।

जिल्ला प्रशासन कार्यालयको फैसलाविरुद्ध अस्पतालले तत्कालीन पुनरावेदन अदालत पाटनमा मुद्दाको पुनरावेदन दर्ता गराएका थिए । पुनरावेदन अदालतले पनि जिल्ला प्रशासनकै फैसलालाई सदर गरेपछि अस्पताल प्रशासन सर्वोच्च अदालत पुगेको थियो ।

सर्वोच्च अदालतका न्यायाधीशहरु पुरुषोत्तम भण्डारी र टंकबहादुर मोक्तानको संयुक्त इजलाशले बुधबार पुनरावेदन अदालतकै फैसला सदर गरेको हो ।

सर्वोच्चको आदेशपछि अब प्रसूति गृहले पीडित पक्षलाई ५ लाख रुपैयाँ क्षतिपूर्ति उपलब्ध गराउनुपर्ने भएको छ ।