रसुवा– रसुवाको मैलुङ–स्याफ्रुबेसी सडक खण्डमा सोमबार साँझ टाटासुमो दुर्घटना हुँदा २ जनाको मृत्यु भएको छ । पोखराबाट रसुवाको गोल्जुङ जाँदै गरेको बा १० च ५८२० नम्बरको टाटा सुमो कालिका गाउँपालिका १ स्थित गुम्चेतमा दुर्घटना भएको हो ।

दुर्घटनामा ६ जना घाइते भएका छन् । दुर्घटनामा परी ज्यान गुमाउने दुई महिला रहेको र उनीहरुको पहिचान खुल्न बाँकी रहेको रसुवाका प्रहरी प्रमुख प्रहरी नायब उपरीक्षक भागेन्द्र ढकालले जानकारी दिए । उनका अनुसार दुर्घटनामा परेर घाइते भएका ६ जनालाइ उपचारको लागि जिल्ला अस्पताल त्रिशूली नुवाकोट ल्याइएको छ । घाइते हुने ६ जना मध्ये दुई बच्चा र एक महिला रहेका छन् ।

प्रहरीको अनुसार जीपमा ११ जना यात्रु रहेको पाइएकाले दुर्घटना पश्चात् हराइरहेकाहरुको खोजी भइरहेको छ । गाडी त्रिशूली नदि किननरमा पुगेकाले हराएकाहरु नदिमा परेर बेपत्ता भएको हुनसक्ने प्रहरीको अनुमान छ । घटनास्थलमा उद्वार एंव खोजीको लागि रसुवा र नुवाकोटबाट खटिएको नेपाल प्रहरी, सशस्त्र प्रहरी र नेपाली सेनाको टोलीले खटिएको छ ।